ప్రభుత్వ కార్యక్రమంలో కనిపించని మంత్రి కొండా సురేఖ ఫొటో, పేరు

రాష్ట్ర మంత్రివర్గంలో మార్పులు జరగనున్నాయని, మంత్రి కొండా సురేఖను పదవి నుంచి తప్పిస్తారని వస్తున్న ఊహాగానాలకు బలం చేకూర్చేలా ఓ కీలక పరిణామం చోటుచేసుకుంది. సొంత ఉమ్మడి జిల్లా పరిధిలోనే జరిగిన ఓ ప్రభుత్వ కార్యక్రమంలో ఆమె ఫొటో, పేరు లేకపోవడం రాజకీయంగా కలకలం రేపింది. ఈ ఘటన కాంగ్రెస్ వర్గాల్లో తీవ్ర చర్చకు దారితీసింది.

మహబూబాబాద్ జిల్లా కేసముద్రంలో సోమవారం పలు అభివృద్ధి కార్యక్రమాలు జరిగాయి. మంత్రులు పొంగులేటి శ్రీనివాస్‌రెడ్డి, సీతక్క కలిసి విద్యుత్ సబ్‌స్టేషన్‌ను ప్రారంభించారు. అలాగే, మునిసిపాలిటీ నూతన భవన నిర్మాణానికి శంకుస్థాపన చేశారు. అనంతరం ఏర్పాటు చేసిన బహిరంగ సభలో ప్రసంగించారు. అయితే ఈ కార్యక్రమం కోసం ఏర్పాటు చేసిన ఫ్లెక్సీ వివాదానికి కేంద్ర బిందువుగా మారింది.

ఈ ఫ్లెక్సీలో ముఖ్యమంత్రి రేవంత్‌రెడ్డి, ఉప ముఖ్యమంత్రి భట్టి విక్రమార్కతో పాటు ఇతర మంత్రులు, ఎంపీలు, ఎమ్మెల్యేల ఫొటోలు ఉన్నాయి. ఆశ్చర్యకరంగా, బీఆర్ఎస్‌కు చెందిన ఎంపీ వద్దిరాజు రవిచంద్ర, ఎమ్మెల్సీ తక్కెళ్లపల్లి రవీందర్‌రావు ఫొటోలను కూడా ముద్రించారు. కానీ, ఉమ్మడి వరంగల్ జిల్లాకు చెందిన మంత్రి కొండా సురేఖ ఫొటోకు మాత్రం చోటు కల్పించలేదు. అంతేకాకుండా, శంకుస్థాపన శిలాఫలకంపై కూడా ఆమె పేరును చేర్చకపోవడం గమనార్హం.

మరోవైపు, ఈ కార్యక్రమానికి మంత్రి సురేఖ గైర్హాజరు కావడం కూడా చర్చనీయాంశమైంది. తనను మంత్రివర్గం నుంచి తొలగిస్తారనే ప్రచారం జరుగుతున్న తరుణంలోనే, సొంత జిల్లాలో ప్రోటోకాల్ పాటించకపోవడం వెనుక బలమైన రాజకీయ కారణాలు ఉన్నాయని విశ్లేషకులు భావిస్తున్నారు.